Бастакы Хаҥалас нэһилиэгэр Халыма тииптээх сүөһүнү иитэр сылгы Собуота, Үлэ сылын чэрчитинэн «Дьөһөгөйүм оҕото» альбом-кинигэтин сүрэхтээтэ.
Кинигэҕэ сылгы иитиитэ, холкуос, сопхуос, Ленин дьаһалын саҕанааҕы олохтон саҕалаан бу күҥҥэ диэри үлэлээн кэлбит кэмэ суруллар. Оччотооҕу кэмтэн билигин үлэлии сылдьар дьон ахтыыта киирбит. Альбом-кинигэ сылгы Собуотун дириэктэрин Константин Винокуров көҕүлээһининэн, тэрилтэҕэ өр кэмҥэ үлэлээбит, уопуттаах исписэлиис Софья Куликова хомуурунан күн сирин көрдө.
Ааптар айымньытын туһунан бу курдук билиһиннэрэр:
«Кинигэбит матырыйаала 2-тэн тахса сыл хомуллубута. Дьокуускай куорат САХАТАЙМ кинигэ кыһатыгар, халыҥ тастаах, альбомн быһыылаах бэчээттэннэ. Бу үлэбит Дойдуга — уһуйааччы уонна Аҕа сүбэһит, СӨ — Үлэ, улууска — Аҕа сылын чэрчитинэн түбэһэ тахсыбытыгар олус үөрэбит. Манна нэһилиэккэ сылгы иитиитигэр сүҥкэн кылааты хаалларбыт, тыа хаһаайыстыбатын сайдыытыгар олохторун анаабыт үлэ дьонун туһунан уонна билигин үлэлии сылдьар дьон ахтыыта киирдэ. Ахтыыларга сылгыбыт бу күҥҥэ диэри хайдах тутуллан, сайдан кэлбитэ, хаан атастаһыытыгар уонна да атын сыалга-сорукка ханна ыытыллыбыта, билигин улууспутуттан ураты ханна иитиллэрэ, тарҕаммыта кэпсэнэр. «Суруллубут — суоруллубат» диэбиккэ диэри, улууска соҕотох Халыма тиибин тутан олорор сылгы Собуотун туһунан үтүө өйдөбүл, ыччакка холобур буолар дириҥ устуоруйалаах архыып буолан хаалыаҕа. Кинигэ таһыгар, биир дойдулаахпыт, удьуорунан талааннаах уолбут, Ойуһардаах орто оскуолатын учуутала Владимир Владимирович Батюшкин уру4уйа киирдэ. Бу эмиэ дириҥ суолталаах ойуу буолар, уруһуйга дойдубут айылҕата, аҕа оҕотун уһуйуута-такайыыта ойууланар».
Ааптар: Саргылана Кокорина