Бэс ыйа — Үрүҥ Айыы ыйа. Бу кэм былыр былыргыттан сайылыкка көһүү, сайыны көрсүү үөрүүтүнэн биллэрэ.
Өбүгэлэрбит сайылыкка көһөн, олохсуйан, түптэ оттунан, алаастарын, эбэлэрин аһатан, бэйэ бэйэлэригэр ыаллардаһаллара. Уһун тымныы кыһын устата дьиэ-уот түбүгүттэн быыс булбакка түбүгүрбүт сылааларын таһааран, үөрэ-көтө көрсүһэллэрэ.
Үтүө үгэс салҕанар аналлаах. Ол курдук, Өлөөкөҕө кус ытыытын кэмигэр, сайыны көрсө кэрэ аҥардарга аналлаах спортивнай күрэхтэһии ыытыллар.
Быйылгы күрэхтэһиини «Дьүөгэ» түмсүү тэрийэн ыытта. Түмсүү салайааччыта Винокурова В.И. күрэхтэһии тэрээһинин маннык диэн кэпсээтэ:
Урут күрэхтэһиини тэрилтэлэринэн, саастарынан диэн арааран ыытыллар этэ. Быйыл кыра уларытыылары кииллэрдибит. Ол курдук, биэс хапытааны булан баран оскуола оҕолоруттан, эдэр ыччаттартан, орто саастаахтартан,бэтэрээннэртэн уоннуу киһини түмтүбүт. Күрэхтэһии иннинэ оҕуруотчуттарга, сибэкки үүннэрээччи далбардарга аналлаах дьаарбаҥка тэрилиннэ. Манна оҕуруот аһын араас көрүҥүн, арбуһуттан саҕалаан сүбүөкүлэ арассаадатыгар тиийэ, дьиэ сибэккитин эгэлгэтин атыылаатылар, атыыластылар.
Күрэхтэһии саҕаланыытыгар хапытааннар сэрэбиэйинэн хамаандаларын дьонун талыннылар. Онон соһуччу хамаандалар талыллан күрэхтэстилэр. Түһүмэхтэрбит эмиэ талыллан саастарынан араарылыннылар.
Быйылгы күрэхтэһиини бииргэ төрөөбүт балтым Екатерина Иннокентьевна Санникова төрөөбүт күнүгэр түбэһиннэрэн тэрийдибит. Катябыт спортивнай күрэхтэһиилэргэ, хаһан да туора туран хаалбакка көхтөөхтүк кыттара. Олус сөбүлүүрэ»
40 кэрэ аҥар кыттыылаах күрэхтэһии араас түһүмэхтэрин ааһан Семенова Алена хапытааннаах «Солнышко» хамаанда кыайыылаах буолла. Иккис Третьякова Анжелика хапытааннаах «Чыпчаал» хамаанда оттон үһүс Бубякина Мария «Надежда» хамаандата буоллулар. Кыайыылаахтарга олохтоох урбаанньыппыт А.В. Винокурова астаабыт тортара, оттон кыттааччыларга «Дьүөгэ» түмсүүттэн минньигэс бэлэхтэр туттарылыннылар. Бары кыттааччылар олус астынан, дуоһуйан, оттон тэрийээччилэр кэлэн көхтөөхтүк кыттыбыттарын иһин хардарыта махтанан, тэрээһиммит үөрүүлээхтик түмүктэннэ.
Изабелла Ноговицына, Өлөөкө-Күөл б.