Бу күннэргэ бастыҥ үлэ дьоно ходуһаҕа үктэннэ. Бу күн туругунан, улуустааҕы тыа хаһаайыстыбатын управлениетын ыйдааҕы субуокката көрдөрөрүнэн, улуус үрдүнэн 1165 ынах сүөһү, 2877 сылгы күөххэ үктэммит. Орто Халыма улууһун дьаһалтатын баһылыгын уурааҕынан быйыл 5450 туонна от оттонуохтаах. Ааспыт сылы кытта тэҥниир буоллахха, былаан сыыппарата оннунан хаалбыт.
Улуустааҕы тыа хаһаайыстыбатын управлениетын начаалынньыга Д.Н.Винокуров:
«Быйылгы былаантан ынах сүөһү иитиитигэр 2730, сылгы харалтатыгар 2720 туонна от туһаныллыаҕа. Быйыл от үүнүүтэ куһаҕана суох. Бастыҥнар окко киирдилэр. Арҕахтаахха, Налимскайга кэтэх хаһаайыстыбалаах дьон хотуурдара түстэ. Өлөөкө Күөллээҕи сылгы Собуотун биригээдэлэрэ ходуһаҕа от ыйын 15 күнүттэн киирэр былааннаахтар. Кинилэр быйылгы былааннара 838 туоннаҕа тэҥнэһэр. Григорий Батюшкин салайааччылаах, тиэхиньикэнэн толору хааччыллыылаах Чоҥкуйа биригээдэтэ 600 туонна от оттуур былааннаах. Таалалаах, Иван Винокуров биригээдэтэ 350 туонна оту ылыахтаах. Сылгы Собуотун Ойуһардаахтааҕы филиалын Илин Эбэ ходуһатыгар, биригэдьиир Родион Бандеров дьаһалынан 400 туонна от оттонуохтаах.
Быйыл салалтабыт, Бастакы Мээтис нэһилиэгин урбаанньытыгар Иннокентий Березкиҥҥа от субурҕатын хомуйан, ыга баттатан түүтээхтиир массыынаны ыларыгар көмө оҥордо. Маны сэргэ Иккис Мээтис нэһилиэгин олохтоох дьаһалтата оттуур тиэхиньикэ кэмпилиэгинэн (косилка, борошилка, пресс-подборщик) хааччылларыгар төһүү күүс буоллубут. Саппаас от Эбээххэ, Ойуһардаахха оттоноро былааннанар. Атын да нэһилиэктэргэ, балаһыанньаттан көрөн, саппаас от бэлэмнэниллэригэр кыһаллыахтаахпыт. Хас биирдии хаһаайыстыба кыстыгы хайдах бэлэмнээх көрсөрө, бэйэ дьаһанарыттан тутулуктаах».
Ааптар: Саргылана Кокорина
Хаартыска: 2024 бастыҥ хотуура түстэ