Тэрээһини улуус дьаһалтатын хонтуруоллуур-анаарар отделын начаалынньыга М.Н. Винокурова салайда, кинини кытта норуот билинэр уопсастыбанньыктара А.П.Явловская, А.С.Бережнова уонна С.В.Татаринова кыттыыны ыллылар.
Хомойуох иһин биллэр биричиинэнэн (интэриниэт ситимэ мөлтөҕө), Өлөөкө Күөлэ, Сылгы Ыытар, Налимскай эрэ дьаһалталара куйаар ситимҥэ холбоннулар.
Истэрбит, кэпсиирбит курдук, улуус нэһилиэктэригэр үгүс түмсүү көхтөөхтүк үлэлиир, уопсастыбаннай хамсааһын күөстүү оргуйар. Уопсастыбанньыктар баар буоланнар үгүс үлэ ыытыллар, улуус сайдар- кэскиллэнэр.
Мунньах кыттыылаахтарыгар, хас биирдии нэһилиэктэн, Дьахтар түмсүүтүн бэрэссэдээтэлин уонна чилиэттэрин испииһэгин ыыталларыгар сорук киирдэ. Ол испииһэгинэн олоҕуран, олунньу 14 күнүгэр, улуустааҕы Дьахтар Сойууһун бэрэссэдээтэлэ уонна чилиэттэрэ талыллыахтара.
Маны сэргэ салайааччылар, сыллааҕы былаантан быһа тардан кэпсээтилэр.
Үлэ торума сиһилии, улуустааҕы Дьахталлар Сойуустарын кэмитиэтэ олохтонноҕуна чуолкайданыаҕа.
Ааптар: Саргылана Кокорина