Бука бары БЫЫБАРГА

Орто Халыма улууһугар нэһилиэнньэлээх пуунтан ыраах, сырыы-айан ыытылларыгар уустуктардаах учаастактарга дьону быыбардатар үлэ түмүктэннэ.

Үлэ түмүгүнэн, балаҕан ыйын 7 күнүн туругунан, Орто Халыма киин куоратыттан уонна Бастакы Хаҥалас, Иккис Мээтис, Сиэн Күөл уонна Березовка нэһилиэктэриттэн уопсайа 62 киһи куолаһын биэрдэ, гражданскай быраабын толорду туһанна.
«Хас биирдии киһи куолаһа суолталаах диэн сыалтан, Орто Халыма улууһугар атырдьах ыйын 31 күнүттэн ыраах сытар учаастактарга айаннаах үлэбитин саҕалаабыппыт.

Ол курдук Орто Халыма куоратыгар — 13, Өлөөкө Күөлүгэр — 26, Сыбаатайга —12, Ойуһардаахха — 7, Березовкаҕа — 4 киһи быыбардаата. Территориальнай быыбардыыр хампаанньалар, учаастактарга араас тиэхиньикэнэн, тырааныспарынан, холобур, Березовка таба иитэр ыстаадатыгар бөртөлүөтүнэн көтөн, өрүстээх, күөллэрдээх сирдэргэ, Халыма өрүс учаастактарыгар уу луоккатынан, сылгы, ынах сүөһү иитэр, дьон сайылыыр учаастактарыгар, оттуур ходуһаларыгар, сиринэн сылдьар араас тиэхиньикэнэн, сатыы хааман, эбээһинэстээх үлэлэрин ситиһиилээхтик толордулар. Куоластааччы ахсаанын көрдөххө, кэнники сылларга, быйыл үчүгэй көрдөрүү диэн бэлиэтиибит.
Сарсыҥҥыттан, сарсыарда 08ч.00м. Орто Халыма куоратын икки эбийиэгэр уонна нэһилиэк аайы анал миэстэлэргэ Быыбардыыр хампаанньалар тустаах үлэлэрин саҕалыырга бэлэм олороллор», — диэн Орто Халыма улууһун территориальнай быыбардыыр хамыыһыйатын сэкирэтээрэ Анастасия Николаевна Слепцова иһитиннэрдэ.

Ааптар:Саргылана Кокорина

Читайте дальше