Ахсынньы 12 күнүгэр «Аартыка суоллара» ХТ, Ойуһардаахха диэри 10 туоннаҕа диэри уйуктаах тиэхиньикэ сырыытыгар суолу арыйда.
Бу күннэргэ суол хаарын ыраастыыр үлэ Хатыҥнааҕынан Үөһээ Халыма кыраныыссатыгар уонна Арҕахтааҕынан Андрюшкиноҕа уонна Алаһыайынан Сыбаатайга, Эбээххэ, Өлөөкө Күөлүгэр тиийэр суолга оҥоһуллар. Үөһээ Халыма хайысхатыгар, суолу сиринэн оҥорууга «Кировец», атын нэһилиэктэр суолларыгар чэпчэки ыйааһыннаах тиэхиньикэлэр таҕыстылар.
Нэһилиэктэргэ тустаах үлэ түмүктэннэҕинэ, тэрилтэ маастардара суол-иис туругун нуормаҕа эппиэттииринэн бигэргэттэхтэринэ, суол бэлиэлэрэ туруорулуннахтарына, кэлэр нэдиэлэттэн тустаах хайысхалар суоллара арыллаллара былааннанар. Маны сэргэ бу күннэргэ суолу-ииһи көрөр, үрэх, күөл мууһун кээмэйдиир үлэ Березовка суолугар ыытыллыаҕа.
Чоҕу тиэйии үлэтэ, 20 туоннаҕа диэри уйуктаах тиэхиньикэлэргэ көҥүл бэрилиннэҕинэ, саҕаланыаҕа.
Ааптар: Саргылана Кокорина
Хаартыска: Үлэ түгэннэриттэн / Ааптар: Иван Кокорин