Ахсынньы 21-23 күннэригэр биирдиилээн бастыыр иһин комбинированнай пирамидаҕа өрөспүүбүлүкэ араас муннуктарыттан 80 киһи түһүлгэҕэ түмүстэ.
Тыҥааһыннаах күрэххэ 50-тан аҕа саастаах дьоҥҥо биһиги улууспутуттан Иван Тарасов Саха Сирин чөмпүйүөнүн үрдүкү аатын ылары ситистэ. 2022 сыллаахха бу дьиссипилиинэҕэ уонна бөлөххө, билигин биһиги кэккэбитигэр суох күндү биир дойдулаахпыт Василий Васильевич Винокуров дьоһуннаахтык хотон үөрүүтэ-көтүүтэ муҥура суох этэ.
Турнирга эдэрдэр оонньууларыгар Хатыҥнаахтан төрүттээх Василий Кудрин 40-тан тахса чулуу оонньооччуттан чорбойон үрүҥ көмүс призёр буолары ситистэ. Саҥа үүммүт сылга, үгэс буолбут өрөспүүбүлүкэ таһымнаах турнирга, динамичнай пирамидаҕа биллиилээх меценат, пропагандист, энтузиаст, Саха Сиригэр бильярд успуордугар бэтэрээннэр ортолоругар икки төгүллээх Чөмпүйүөн Владимир Агарков кэриэһигэр буолан ааста. Бу турнирга Иван Тарасов 90-ча кыттааччыттан үрүҥ көмүс призёр аатын сүгэн Орто Халымалары үрдүкү үктэлгэ таһаарда.
Тохсунньу 6-7 күннэригэр, бильярд успуорда балысханнык сайдарыгар үтүмэн үлэни ыыппыт, элбэх күрэххэ Чөмпүйүөн, призёр буолбут «Алаһыай» Кубогын бильярка бирииһин сүрүн тэрийээччитэ, 2023 сыллаахха Халыма-Индигиирдээҕи зона муҥутуур кыайыылааҕа, өрөспүүбүлүкэ икки төгүллээх кыайыылааҕа, баһаарынай чааһы үйэ чиэппэриттэн ордук кэмҥэ сатабыллаахтык салайбыт убаастыыр Убайбыт Василий Васильевич Винокуров сырдык кэриэһигэр турнир буолан ааста. Манна хамаанданан бастыыр систиэмэлээх үрдүк таһымҥа тэрилиннэ.
Күрэххэ хамаанда састааба 5 киһиттэн турбута (3 бэтэрээн уонна 2 эдэр оонньооччу). Сайаапка быһыытынан 16 хамаанда илин-кэлин түһүстэ. Өрөспүүбүлүкэҕэ күүстээх фаворит улуустар кыттыыны ыллылар. Маны сэргэ улууһуттан тутулуга суох, кэрэ аҥардарга 2 толорду хамаанда кииристэ. Баһылайбыт дьиэ кэргэнэ, бииргэ төрөөбүттэрэ бу улахан турнирга кыттыбыт 80 бильярдиска, бильярд федерациятыгар махталларын биллэрэн итии чэйдээх сандалы, дууһаны долгутар ахтыы биэчэрин тэрийбиттэрэ.
Турнир түмүгүнэн, Күөх Ньурба кэрэ аҥардарын «Звезда» хамаандата инники тахсан кыайыынан кынаттанна. Дьокуускай 2-с хамаандата уонна Кэбээйи хамаандалара үһүс миэстэни үллэһиннилэр. Инникитин да Баһылай кэриэстэбил турнира буола, тэриллэ турарыгар, Календарнай Былааҥҥа хабыллан үп өттүнэн өйөбүллээх буоларыгар баҕа санааларын кыттааччылар биллэрдилэр.
Турнирга бириистээх миэстэлэргэ тиксибиттэргэ Баһылай дьоно-сэргэтэ, дьиэ кэргэнэ, бииргэ төрөөбүттэрэ, Орто Халыма бильярдистара харчынан көмө бөҕөтүн оҥордулар, кыттааччыларга болҕомтону тартылар. Турнир ил-эйэ эйгэтин тула барбыта Баһылай үтүө киһитин өссө төгүл көрдөрдө.
Түгэнинэн туһанан, турнир көхтөөхтүк ыытылларыгар сүүрбүт-көппүт, көмө буолбут дьоммутугар, Хатыҥнаахтан төрүттээх Алексей Андросовка, Василий Кудриҥҥа уонна Иван Тарасовка барҕа махталбытын тиэрдэбит.
Ааптар: Василий Ефимов