Кулун тутар 22-24 күннэригэр Дьокуускай куоракка Аграрниктар (Тыа хаһаайыстыбатын салаатынан дьарыктанар киин улуустар) уонна Арктическай улуустар хамаанданан күрэхтэрэ буолан ааста.
Хас биирдии хамаанда 6 киһилээх: 18 диэри саастаах 1 уол оҕо, 40-гар диэри саастаах кэрэ аҥаар — 1, эр киһи — 1, 50-гар диэри саастаах эр киһи — 1, 60-гар диэри саастаах ветеран эр киһи — 1 уонна 60-тан үөһээ эр киһи ветеран — 1. Бу күрэх умнууга хаалан баран, сөргүтүллэн быйыл тэриллэн 14 толорду хамаанданы түмтэ, ол иһиттэн Арктическай улуустартан Орто Халыматтан уонна Муоматтан 2 хамаанда кытынна. Балаһыанньа быһыытынан эдэрдэр свободнай пирамидаҕа, орто саастаах эр дьоннор динамичнай пирамидаҕа уонна ветераннар комбинированнай пирамидаҕа күөн көрүстүлэр. 3:3 буолар түбэлтэтигэр, парнай оонньуу хамаанда хоторугар бүтэһик оонньуу диэн быһаарыллыбыта, маннык түгэнигэр эдэр уол уонна 40-гар диэри саастаах эр киһи холбоһук састааба буолбута.
Биһиги хамаандабыт састаабыгар киирэн оонньоотулар: уол оҕо-Сергей Семёнов (Хатыҥнаах), кэрэ аҥаар-Анжелика Третьякова (Орто Халыма куората), 40 саастарыгар диэри Валерий Оконешников (Ойуһардаах), 40-тан үөһээ Павел Акакиев (Хатыҥнаах), 60-гар диэри ветеран Степан Слепцов (Эбээх) уонна 60-тан үөһээ Василий Ефимов (Эбээх).
Аграрнай улуустар күүстээх састааптаах хамаандаларын кытары илин-кэлин түсүһүүгэ полуфиналга 3 Хоту улуус (Муома-1, Орто Халыма, Кэбээйи) уонна Үөһээ Бүлүү улуустара көрсүбүттэрэ.
Түмүгэр Муома бастакы хамаандата эрэллээхтик бастаата, иккискэ Үөһээ Бүлүү, үһүскэ Кэбээйи, төрдүскэ Орто Халыма улуустара. Бу эмиэ бэйэбитигэр куһаҕана суох көрдөрүү. Тыҥааһыннаах бүтэһик парнай киирсиилэргэ Валерий Оконешников уонна Сергей Семёнов хамаанда инники күөҥҥэ тахсарыгар хаста да хотон тулуурдарын, дьулуурдарын көрдөрдүлэр. Бу күрэххэ кэккэ уонна убаастанар биричиинэнэн инники күөҥҥэ сылдьар фавориттарбыт: Иван Тарасов, Василий Кудрин, Евгений Слепцов, Сергей Шарин, Иван Сибиряков, Анжела Петрова кыттыбатахтара финалга тиийбэтэх түһүмэхпит буолуон сөп курдуга.
Ол кэнниттэн кулун тутар ый 26-31 күннэригэр сыллата ыытыллар Республиканскай таһымнаах биллиилээх бильярдист, меценат, Сахабыт Сиригэр бильярд федерациятын вице-президенынан таһаарыылаахтык үлэлээбит Степан Алексеев сырдык кэриэһигэр аналлаах турнир биирдиилээн бастыыр түһүмэхтэрдээх, динамичнай пирамида дисциплиналаах күрэҕэ киэҥ далааһыннаахтык тэриллэн ааста.
Бу да сырыыга күүстээхтэр күөн көрсүһүүлэрэ, хатыһыылаах хапсыһыылара хатыланна. Ол курдук 50 саастарыгар диэри эр дьоҥҥо — 52 киһи, 50-59 саастаах эр дьоҥҥо (эдэр ветераннар) — 49 киһи, 60 үөһээ саастаахтарга 48 киһи уонна кэрэ аҥаардарга 17 киһи кытынна. Онон турнирга 166 кыттааччы буолбута. 50 саастарыгар диэри састаапка Орто Халымабыт улууһуттан Евгений Слепцов (Эбээх), Сергей Шарин, Павел Акакиев, Иван Сибиряков (Хатыҥнаахтар), 50-59 саастаахтарга Алексей Андросов (Хатыҥнаах), Степан Слепцов (Эбээх), 60-тан үөһээ Иван Тарасов (Ойуһардаах), Василий Ефимов (Эбээх), Петр Винокуров (Сылгы Ыытар), кэрэ аҥаардарга Анжелика Третьякова (Орто Халыма куората) уонна Екатерина Бандерова (Ойуһардаах) кытыннылар.
Түмүккэ бу күүстээх састааптаах Республиканскай таһымнаах күрэххэ бэйэлэрин бөлөхтөрүгэр Сергей Шарин 3-с миэстэ, Алексей Андросов 2-с миэстэ, Василий Ефимов 3-с миэстэ уонна Иван Тарасов 1-кы миэстэ буолары ситистилэр.
Бу ситиһиилэр Халыма-Индигиирдээ5и 5 сыллаах (2020-2024 сыллар) турнирдарыгар уһаарыллыы Үрдүк ситиһиилэрэ буоларын тоҕоһолуур. Онон сааһыттан тутулуга суох бильярд эриэккэс эйгэтигэр сыһыаҥҥытын сыһыарыҥ, дьаныардаахтык дьарыктаныҥ, сүрэххитинэн сөбүлээҥ диэн ыҥырабыт.
Бириистээх миэстэҕэ тиксибит бары оонньооччулары бильярд спордун эйгэтигэр сэмэйэ суох ситиһиигитинэн эҕэрдэлиибит, инникитин да кыайыы көтөллөнөн Төрөөбүт Халымаҕытын Аар-саарга ааттата, суон сурахтата туруҥ диэн алҕыыбыт.
Ааптар: Василий Ефимов