От ыйын 28 күнүгэр Өлөөкө Күөлүгэр «Сайыҥҥы биир күн — дьылы аһатар» девизтээх оту кэбиһиигэ субуотунньук ыытылынна. Үлэ тэрээһинигэр сылгы Собуотун, олохтоох дьаһалтатын, ОДЬКХ, оҕо уһуйаанын эр дьонун уонна оскуола улахан кылааһын оҕолорун күүстэринэн 20 от туруорулунна.
Үлэ бырааһынньыгын туһунан сылгы Собуотун дириэктэрэ Константин Винокуров маннык кэпсиир:
«Ааспыт күһүн нэһилиэнньэ күүһүнэн өр кэмҥэ кууран турбут Таалалаах оттуур ходуһабытыгар өртөөһүнү ыыппыппыт. Ол түмүгүнэн быйыл бу сирбит хайа да сыллааҕар тупсан, отун өлгөмнүк үүннэрдэ. Онон быйыл Таалалаахха Иван Винокуров салайааччылаах от биригээдэтэ, нэһилиэнньэ субуотунньуга төһүү күүс буолан, бастыҥ хаачыстыбалаах отунан 300 туонна былаанын толордо. Субуотунньукка 10 киһилээх 3 биригээдэ үлэлээн, 50-тан тахса туонна от кыстыкка бэлэмнэннэ.
Сылгы Собуотун уонна тус бэйэм ааппыттан олохтоох дьаһалтабыт баһылыгар Афанасий Томскайга, отчуттарбытыгар, субуотунньукка кыттыыны ылбыт дьоммутугар истиҥ махталбытын тиэрдэбит. Кытаанах доруобуйаны, тус олохторугар дьолу-соргуну баҕарабыт. Тулалыыр эйгэлэрэ баай талым олоҕунан, эйэлээх халлаанынан барҕара туруохтун! Нэһилиэкпит, тыа хаһаайыстыбабыт сайдарын туһугар, бу курдук куруук түмсүүлээх, сомоҕо күүс буолуоҕуҥ!».
Ааптар: Саргылана Кокорина
Хаартыскалар: Сылгы Собуотун дириэктэрэ Константин Винокуров
