Дьокуускай куоракка «Үргэл» арт-галереяҕа Налимскай орто оскуолатын туйгун выпускнига, АГИКИ-ны туйгуннук бүтэрбит Маина Альбертовна Еремеева уонна кини дьүөгэтэ Сардаана Петрова персональнай быыстапкаларын бар дьонноругар бэлэх ууннулар. Быыстапка кулун тутар 21 күнүттэн муус устар 12 күнүгэр диэри ыытыллыаҕа.
Маина Еремеева: «Орто Халыма улууһун Байды нэһилиэгиттэн төрүттээхпин. Кыра эрдэхпиттэн уруһуйдуубун, ийэм Валентина Ивановна Налимскай орто оскуолатыгар ИЗО, черчение, технология учууталынан 25 сыл үлэлээбитэ. Билигин пекарняны салайар уонна почтаҕа үлэлиир. Аҕам Альберт Иннокентьевич — ОдьКХ үлэһитэ, илиитигэр дьоҕурдаах, уруһуйдуур, стенгазеталары, биллэриилэри суруйааччы.
Уруһуйга бастакы учууталым ийэм буолар, букатын кыра эрдэхпиттэн дьарыктыыра, онтон оскуолаҕа ийэм ыытар ИЗО студия куруһуогар сылдьар этим, элбэх конкурстарга кытыннарааччы.
Оскуола кэнниттэн тутатына АГИКИ «живопись уонна графика» кафедратыгар «станковая живопись» диэн 6 сыллаах үөрэххэ киирбитим. Учууталым Аан Дойдуга биллэр худуоһунньук, академик Дьулустан Афанасьевич Бойтунов. Онно үөрэнэ сылдьан дьүөгэбин Сардаана Петрованы кытта билсибитим, кини Горнай улууһун Бэрдьигэстээҕиттэн төрүттээх. Иккиэн Дь.А. Бойтуновка үөрэммиппит. Сардаана бастаан ЯХУ (Якутское художественное училище) бүтэрбитэ, онтон АГИКИга киирбитэ.
Учууталбыт элбэх ыраас өңнөөх хартыынаҕа үөрэппитэ, иллюстрация эйгэтин көрдөрбүтэ. Билигин үөрэхпитин бүтэрбиппитин да кэннэ көмөлөһө, көрө-истэ, сүбэлии-амалыы сылдьар.
Үөрэхпин 2020 сыллаахха туйгуннук бүтэрбитим.
Быыстапка туһунан этэр буоллахха, дьүөгэбин кытта эрдэттэн быыстапкалыахпытын баҕарар этибит, онтон дьэ былырыын быыстапкалыыр эбиппит диэн быһаарынаммыт «Үргэл» арт-галереяҕа былааңңа киллэрбиппит.
Галереяны таларга элбэҕи көрдүү барбатахпыт, «Үргэл» — элбэх ааттаах худуоһунньук сүрэхтэммит сирэ уонна эдэр худуоһунньуктарга босхо буолара эмиэ суолталаах этэ.
Быыстапкаҕа үксүн натюрмортар турдулар, үөрэнэ сылдьан оңорбут уонна билиңңи үлэлэрбит киирдилэр. Дьон биһиги буочарбыт уларыйыытын өйдөөн көрүөн сөп.
Хоту дойдуттан сылдьар буоламмын, дойдум туһунан үлэлэр бааллар, холобур дипломнай үлэм «Рейс 217. Якутск — Среднеколымск» диэн, кыһын саңа дьыл иннинэ сөмөлүөт сатаан көппөтөх кыһалҕатын туһунан сырдатар, бэйэм хаста даҕаны кэмигэр көппөккө, хаайтаран, оннук идея киирбитэ. Онно ыраах улуустарга тиийбэт, ыарахан сыаналаах малы, аһы куораттан илдьэрбит туһунан дьон багааһыттан көрүөххэ сөп.
Быыстапкабыт «Сааскы уһуктуу. Цветение весны» диэн сүрэхтэннэ. Аһыллыыта оруобуна күн тэңнэһэр күнүгэр уонна сахаларга саас саҕаланар кэмигэр, кулун тутар 21 күнүгэр түбэспитэ, ол эмиэ быыстапкабыт аатын толкуйдуурга оруолу оонньообута. «Сааскы уһуктуу» диэн үлэлэрбитин бастакытын маннык улахан эйгэҕэ көрдөрөр буоламмыт, айар үлэбит уһуктуута, сайдыыта саҕаланыа турдаҕа диэн эрэнэбит.
Түгэнинэн туһанан, биир дойдулаахтарбын быыстапканы кэлэн көрүң, сэргээң диэн ыңырабын».
