Үс хатыҥ быйылгы өрөспүүбүлүкэтээҕи ыһыаҕар, Орто Халыма улууһа өтөрүнэн ааттамматаҕын ааттаныаҕа.
«Дыгын оонньуулара-2024» 12 бастыҥтан бастыҥнар, бэртээхтэн бэртээхтэр күөн көрсөр күрэстэригэр биһиги биир дойдулаахпыт, Хотугу многоборьеҕа Арассыыйа чөмпүйүөнэ, Алаһыай ыччата — Алексей Созонов кыттыыны ылыаҕа.
2020 сыллаахха Алексейы кытта сэһэргэһэрбэр, Аармыйа кэккэтигэр сулууспалаан кэллэҕинэ, «Дыгын оонньууларыгар» холонон көрөр баҕа санаалааҕын эппитэ.
Дьэ, эр бэрдэ-эппит тыла биир, ол баҕа санаатын толороро аҕыйах хонук хаалла. Кини уопуттаах, сылын ахсын кытта үөрүйэх мадьы-нылары, Дьулустан Ноговицыны (Гуорнай), Артём Дьяконовы (Кэбээйи), Айсен Ботуевы (Үөһээ Бүлүү), Яков Дмитриевы (Кэбээйи), Борис Сдвижкову (Амма), Алексей Соколову (Сунтаар), Николай Обоевы (Ньурба), Павел Друзьяновы (Чурапчы), Алексей Уваровскайы (Кэбээйи), Тимофей Большакову (Сунтаар), Владимир Шологоновы (Үөһээ Бүлүү) кытта кыттан күүһүн холонон көрүөҕэ.
Алексей тириэньэрин, доҕотторун, биир дойдулаахтарын көҕүлээһиннэринэн сүргэтэ көтөҕүллэ, бэлэмнэнэ ахан сылдьар. Кини быыс булан биһиги эрэдээксийэбитигэр, хайдах бэлэмнэнэ сылдьарын туһунан кэпсээтэ:
«Быйылгы Дыгыҥҥа үгэс быһыытынан ыытыллар күрэхтэр ыытыллыахтара: үс төгүл үс, тутум эргиир, мас тардыһыы, оҕунан ытыы, сүүрүү, хапсаҕай, таас көтөҕүү, быраабылаҕа уларыйыылар бааллар. Холобур таас ыйааһына 132 киилэҕэ тэҥнэстэ.
Миигин доҕотторум, биир дойдулаахтарым Айсен Семенов, Дмитрий Шадрин, Максим Кудрин, Егор Кудрин, Павел Созонов, Вадим Винокуров арыаллыыллар, күүс- көмө, өйөбүл буолаллар.
Бэйэбэр эрэнэр көрүҥнэрим — сүүрүү, үс төгүл үс, тутум эргиир, оҕунан ытыы. Мас тардыһыытыгар,таас көтөҕүүтүгэр ыарырҕатыахпын сөп, манна сэрэбиэй хайдах, кимиэхэ түбэһэринэн быһаарыллыаҕа. Күрэх саҕана Павел Созонов аттыбар баар буолуоҕа, көмөлөһүөҕэ; Быйылгы кыттааччылар, бары үөрүйэх, уопуттаах, кыахтарын тургуппут уолаттар.
Кыахпар эрэнэр буоламмын, кыайыыга эрэллээхпин. Сүрүн сорукпунан, Улууспун успуорт өссө биир чыпчаалыгар ааттатыы буолар. Бары кыахпын, кыттыыбын төрөөбүт дойдубар аныыбын.
Ааптар: Саргылана Кокорина