Бүгүн Улуус дьаһалтатын дьиэтигэр амарах санаалаах кэрэ аҥардар мустан анал байыаннай дьайыыга кытта сылдьар уолаттарбытыгар анаан маскировачнай хахха оҥоруутун саҕалаатылар.
Тэрээһин Улуус дьаһалтатын көҕүлээһининэн тэрилиннэ. Анал хаачыстыбалаах матырыйаалы Дьокуускай куораттан улуус дьаһалтатын ГО ЧС кылаабынай исписэлииһэ Андрей Бережнов дьаһаллаан ситтэрдэ. Уопсайа сүүрбэ киһи кэлэн кыттан күүс-көмө буолла. Манна улуус дьаһалтатын, ТГК «Алазея», Орто Халыматааҕы кииннэммит балыыһа, Оҕо ускуустубатын оскуолатын, Н.И.Шарин аатынан Орто Халыматааҕы орто оскуолатын, үлэ уонна социальнай харысхал киинин үлэһиттэрэ, биирдиилээн биэнсийэлээх дьон кэлэн матырыйаалтан хахха тиһиллэр лиэнтэтин кырыйдылар. Маны сэргэ Чокурдаах сэлиэнньэтиттэн үлэ уонна социальнай харысхал киинин салайааччыта биһиги улууспутугар кэлэ сылдьан туора турбата, күүс-көмө кылаатын киллэрдэ.
Бу күннэргэ сиэккэ олоҕо оҥоһулуннаҕына сүрүн үлэтэ саҕаланыаҕа. Тэрийэр кэмитиэт, үтүө дьыалаҕа кыттыһыан баҕалаах дьону дьаһалта дьиэтигэр кэлэн чөмчүүк санааҕытын анал байыаннай дьайыыга кытта сылдьар уолаттарбытыгар көмөлөһүөҕүҥ диэн ыҥырар.
Ааптар: Варвара Оконешникова