Күн Ийэ барахсан баар буолан
Күөх сирэм күргүөмнээн суугунуур.
Алгыстаах аал уоппут оттуллан
Арчылыыр сылааһа угуттуур.
(Н.Герасимов)
Ийэлэрбит кэрэ сэбэрэлэригэр, эйэҕэс сыһыаннарыгар, үлэҕэ бэриниилэригэр, мындыр өйдөрүгэр сүгүрүйэн биир дойдулаахпыт Евдокия Константиновна Созонова Алаһыай нэһилиэгин 32 ийэлэрин, эбээлэрин туһунан үгүс ахтыылары уонна хаартыскалары түмэн, холбуу тиһэн альбом бэчээттэтэн, нэһилиэкпит 90 сыллаах үбүлүөйүгэр сүдү суолталаах бэлэх уунна.
Бэс ыйын 29 күнүгэр Ил-Эйэ дьиэтигэр «Алаһыайым күн күбэй ийэлэрэ» диэн альбом сүрэхтэниитэ буолла. Көмүлүөк оһоҕу оттон, уохтаах кымыһынан, арыылаах алаадьынан күндүлээн, ааспыт кэмнэри кэрэһэлиир ийэлэрбит сырдык мөссүөннээх хаартыскаларын тула олорон, күндү дьоммутугар аналлаах биэчэрбитин саҕалаабыппыт.
2015с. «Үйэлэргэ ахтыллар Алаһыай» диэн кинигэҕэ Евдокия Константиновна элбэх оҕолоох ийэлэр тустарынан суруйбут ыстатыйата бэчээттэммитэ. Онтон ыла кини ийэлэргэ аналлаах альбом таһаарар санаа киирбитин кэпсээтэ. Быйыл ол баҕа санаата ситэриллэн, бар дьонун үйэтиппит дьоллоох.
Санатан эттэххэ, хас биирдии кинигэни, альбому түмэн, таҥан таһаарыы үгүс сыраны-сылбаны, бириэмэни эрэйэр.
Биэчэри олохтоох мелодист Иван Явловскай «Былыр-былыр» диэн ырыатынан «Дьүөгэлиилэр» ансаамбыл киэргэттэ. Маны тэҥэ хоһооннору Т.И.Винокурова, М.М.Третьякова, М.П.Полюхова, И.А.Созонов уонна Г.В.Македонова бэрт иэйиилээхтик аахтылар.
Салҕыы биэчэргэ мустубут дьон ийэлэрин, эбээлэрин туһунан ахтан-санаан аастылар, баҕа санааларын тиэртилэр, сэмэй бэлэхтэрин туттардылар. Ол кур-дук П.А.Еремеева махтанан туран, инникитин аны аҕаларга аналлаах альбом тахсара буоллар диэн баҕа санаатын тиэртэ. Бу курдук бэрт кылгас кэм иһигэр сүүрэн-көтөн үйэлээх альбому таһаартарбыт Е.К.Созоноваҕа Алаһыай нэһилиэгин дьаһалтатын аатыттан Н.М. Оконешникова махтал сурук уонна бэлэх туттарда.
Түмүккэ Евдокия Константиновна альбом күн сирин көрөрүгэр көмөлөспүт биир дойдулаахпытыгар Римма Ноговицынаҕа улахан махталын тиэртэ. Ааптар альбом 37 ахсаанынан бэчээттэммитин уонна эбии ылыан баҕалаах дьон сайаапка түһэриэхтэрин сөбүн бэлиэтээтэ.
Бу курдук энтузиаст киһибит Евдокия Константиновна ыра санаалара өрүү олоххо киирдиннэр, нэһилиэкпит дьонун сырдатар, үйэтитэр үлэтигэр ситиһиилэри, дабайыылары баҕарабыт.
Ааптар: Евдокия Кондакова, Арҕахтаах бөһ.