Алаһыай үбүлүөйүн биир кэрэ-бэлиэ тэрээһининэн «Алаһыайбын туойабын!» Алаһыай мелодистарын ырыатыгар куонкурус буолла.
Ырыа күрэҕэр, балаһыанньа быһыытынан ырыаһыттар дуэтынан иккилии ырыаны: биирэ Алаһыай мелодистарын айымньытыттан, иккиһэ көҥүл ырыаларын толордулар.
Ыллыам ырыа ыллыгын биэчэрин Өлөөкө Күөлүн Н.Д.Созонова аатынан «Күөрэгэй» култуура киинин дириэктэрэ Мария Третьякова иилээн-саҕалаан ыытта.
Куонкуруска 8 дуэт кытынна. Дьүүллүүр сүбэҕэ Орто Халыма «Кулума» култуура киинин уус-уран салайааччыта Николай Тырылгин, дириэктэр эбээһинэһин толорооччу Лена Михайлова уонна олохтоох мелодист, элбэх ырыа ааптара Дмитрий Третьяков үлэлээтилэр.
Тэрээһин түмүгүнэн Байды кыргыттарыгар Августина Созоноваҕа уонна Оксана Третьяковаҕа кыттыы иһин Махтал сурук туттарылынна, Январина Дьячковаҕа, Юлия Третьяковаҕа (Ойуһардаах) — дипломант III, эдьиийдии балыстыы Луиза уонна Римма Третьяковаларга (Ойуһардаах) — дипломант II, Алена Семеноваҕа, Туйаара Слепцоваҕа (Өлөөкө Күөлэ) — дипломант I; кэргэннии дуэт, Георгий, Екатерина Созоновтар (Сыбаатай) — Лауреат III ист., Алексей Слепцов, Иннокентий Гермогенов (Эбээх) — Лауреат II ист., Пелагея Еремеева, Альбина Кондакова (Арҕахтаах) Лауреат I ист. уонна ГРАН-ПРИ хаһаайынынан уонна көрөөччү биһирэбилин Алаһыай кыргыттара Мария Пахомова, Нарыйа Кондакова чахчы ылыахтарын ыллылар. Дьүүллүүр сүбэ бэлиэтээбитин курдук, кинилэр талбыт ырыалара, таҥастара саптара тупсаҕайа, куоластара барсара, ырыа матыыбын нуотатыгар тииийэ тутуһан ыллаатылар.
«Сарыал» култуура киинин дириэктэрэ Анастасия Иванова үбүлүөйдээх тэрээһиннэри тэрийиигэ, тээбириҥҥэ, аппаратураҕа тиийэ күүс-көмө буолбуттарын, хааччыйбыттарын иһин Орто Халыма куоратын «Кулума» култуура киинигэр, «Күөрэгэй» култуура киинин дириэктэригэр, куонкурус сыаналаах бириистэрин успуонсардарыгар, куруук күүс-көмө өйөбүл буолар урбаанньыттарга Руслан, Екатерина Третьяковтарга, Мария Егоровна Сивцеваҕа, Раиса Семеновна Кривцоваҕа Махтал суруктары туттарда.
Маны сэргэ «Кулума» култуура киинин сүрүн бирииһин кэргэннии ырыаһыттар Георгий уонна Екатерина Созоновтар (Сыбаатай) анал бэлэх туттулар.
Ааптар: Саргылана Кокорина
