Балаҕан ыйын 18-24 күннэригэр Саха Өрөспүүбүлүкэтигэр Үлэ сылыгар анаан Үлэ династиятын нэдиэлэтинэн биллэһиллибитэ. Ол чэрчитинэн, Алаһыай нэһилиэгэр балаҕан ыйын 23 күнүгэр биир тустаах хайысхаҕа ылсан үлэлиир, удьуор үлэһит дьиэ кэргэттэри чиэстээһин буолла. Педагогическай династияҕа — Стручковтар, элэктэриичэстибэ уот ситимин эйгэтигэр — Олейниковтар, тыа хаһаайыстыбатыгар – Батюшкиннар дьиэ кэргэттэрэ ааттаннылар.
Маны тэҥэ «Бастыҥ Үлэһит» анал аат тэрилтэлэрбит чулуу үлэһиттэригэр туттарылынна. Ол курдук, Алаһыай нэһилиэгин дьаһалтатын исписэлииһэ Вадим Дмитриевич Винокуров, В.А.Местников аатынан Алаһыай орто оскуолатын учуутала Николай Николаевич Кондаков, «Чуораанчык» оҕо уһуйаанын үлэһитэ Альбина Иннокентьевна Винокурова, олохтоох балыыһа эмчитэ Елена Петровна Созонова, ДЭС үлэһитэ Егор Егорович Созонов, сылгы иитиитинэн дьарыктанар кэтэх хаһаайыстыба салайааччыта Василий Константинович Садовников, олох-дьаһах комунальнай хаһаайыстыбатын үлэһитэ Платон Константинович Садовников уонна «Сарыал» сынньалаҥ култуурунай киин аатыттан олохтоох мэлэдьиис, элбэх ырыа ааптара Дмитрий Михайлович Третьяков үлэ бастыҥнарынан чиэстэнэн, бар дьон биһирэбилин ыллылар.
Биэчэргэ Алаһыай нэһилиэгин Бочуоттаах олохтоохторо уонна үлэ бэтэрээннэрэ үүнэр көлүөнэҕэ истиҥ-иһирэх эҕэрдэ тылларын анаатылар, киһини — үлэ киэргэтэрин тоһоҕолоон бэлиэтээтилэр.
Тэрилтэлэр үлэлии-хамныы сылдьар түгэннэрин тиһэн, видеоҕа устан киэҥ эйгэҕэ таһаардыбыт, эҕэрдэ ырыалар ылланнылар.
Үлэ дьонугар аналлаах тэрээһини олохтоох мэлэдьиис Дмитрий Третьяков ырыатын доҕуһуолунан, бары бииргэ туран, Алаһыайбыт өрөгөй ырыатынан түмүктээтибит.
Ньургуйаана Винокурова.