Арҕахтаах үбүлүөйүн чэрчитинэн, иккис күн, Дойдуга Дьиэ кэргэн сылыгар аналлаах «Алаһыай кубога» спортивнай күрэх ыытылынна.
Дьиэ кэргэнинэн, хамаанданан күрэххэ Өлөөкө Күөлүттэн Николай, Мария Бубякиннар, Евгения, Владимир Сухомясовтар, Оксана, Александр Третьяковтар; Сыбаатайтан Георгий Екатерина Созоновтар, Альберт, Марфа Слепцовтар, Николай, Антонина Моссоеновтар уонна Алаһыай нэһилиэгиттэн Валерий, Любовь Винокуровтар, Алексей, Вера Никулиннар, Александр, Маргарита Третьяковтар кытыннылар.
Тэрийэр хамыыһыйа оҥорбут балаһыанньатынан 35 саастарыгар диэри, 35-50 диэри уонна бэтэрээн дьиэ кэргэттэр күрэхтэстилэр.
Дьүүллүүр сүбэҕэ уонна коментаторынан Алаһыайтан төрүттээх успуонсар-урбаанньыт Руслан Третьяков олоҕун аргыһын Екатерина Иннокентьевнаны кытта үлэлээтилэр. Күрэх Алаһыай эдэр ыччат «Дьулуур» түмсүүтүн салайыытынан, оскуола дириэктэрэ Марианна Шадрина иилээн-саҕалаан ыытыытынан, В.А.Местников аатынан Алаһыайдааҕы орто оскуола успуорт саалатыгар буолла.
Күрэх түһүмэхтэринэн, 35 саастарыгар диэри ыччат мэһэйдэрдээх суолунан сүүрдүлэр, уолаттар ойбонтон уулаатылар, кыргыттар биэдирэлээх ууну бириэмэҕэ туттулар. Орто саастаахтар сиэл мэччиги биэдирэҕэ тамнаатылар, мас тардыстылар, куһу, тииҥи, куобаҕы сыаллаан быраҕыстылар. Бэтэрээннэр – маамыктанан уонна городки оонньуу быраабылатынан уҥуоҕу бырахтылар, тоҥу кыһан көрөөччүлэри күндүлээтилэр.
Күрэх түмүгүнэн, 3-с миэстэни Сыбаатай хамаандата, 2-с Өлөөкө Күөлэ, кыайыылаах Кубога Алаһыайдарга хаалла. Кыайыы көтөллөөх Алаһыай хамаандата аймаҕынан кыттыбыттарын сэргээтибит.
Бу курдук чөл туруктаах, успуорт доҕордоох дьиэ кэргэн үксүү турдун.
Ааптар: Саргылана Кокорина
