Ахсынньы 6 күнүгэр Данил Степанович Слепцов аатынан Эбээх орто оскуолатыгар үгэскэ кубулуйбут «Аһын, таптаа кэрэни» бэстибээл буолан ааста. Тэрээһин 1980-1998 сылларга, элбэх оҕону ахсаан, муусука уруогар үөрэппит, өрөспүүбүлүкэҕэ биллэр ырыа айааччы биһиги киэҥ туттар учууталбыт Николай Данилович Тимофеев аатын үйэтитэр сыаллаах-соруктаах быйыл 22-с сылын ыытылынна.
Бэстибээли саҕалааччыларынан Российскай Федерация үөрэҕириитин Бочуоттаах үлэһитэ, саха тылын уонна литературатын учуутала Евдокия Даниловна Ефимова, Саха Өрөспүүбүлкэтин үөрэҕириитин туйгуннара нуучча тылын уонна литературатын учуутала Елена Петровна Слепцова уонна төрүт култуура учуутала Николай Николаевич Гуляев буолаллар. Быйылгы «Аһын, таптаа кэрэни» бэстибээлбит Дьиэ кэргэн, Оҕо сылыгар ону тэҥэ Улуу Кыайыы 80 сылыгар ананар.
Күрэххэ оскуола үөрэнээччилэрэ 3 бөлөххө арахсан, 9 көрүҥҥэ талааннарын көрдөрдүлэр. Ол курдук: соло уонна ансаамбыл ырыаҕа, пааранан үҥкүү, төрөппүтү кытта нүөмэр, фольклор, ыытаччылар икки ардыларынан күрэх, Кыайыы сылыгар аналлаах уус-уран ааҕыы уонна бөлөх үҥкүүтэ, ону кытары музыкальнай инструмеҥҥа онньооһун. «Аһын, таптаа кэрэни» бэстибээл кэрэҕэ-үтүөҕэ тардар, оҕону култуура эйгэтигэр угуйар, талаанын арыйан инникитигэр олук уурар.
Бу дьоро киэһэҕэ саҥа сэргэх нүөмэрдэр, саҥа ааттар, талааннар тахсан көрөөччүлэри да, төрөппүттэри да үөртүлэр. Быйыл саҥа сүүрээн киирэн оҕолор тыыннаах доҕуһуолунан ыллаан иһитиннэрэн дьон биһирэбилин ыллылар. Бэстибээл түмүгэр дьүүллүүр сүбэ кыайыылахтары быһаарда. Анал ааттар хаһаайыттара буоллулар:
- соло ырыа — Слепцова Элла, 1 кылаас үөрэнээччитэ «Ийэбэр»;
- бөлөҕүнэн ырыа толоруутугар — улахан бөлөх уолаттара «Халыма уола»;
- пааранан үҥкүүгэ — Алена Тырылгина уонна Тамир Гуляев «Ёхор»;
- бөлөх үҥкүүтүгэр — алын кылаас кыргыттара «Отмените войну!»;
- фольклорга — алын кылаас кыргыттара «Чабырҕах»;
- музыкальнай инструмеҥҥа онньооһуҥҥа — орто бөлөх оҕолоро ВИА «ИМБА»;
- уус уран ааҕыыга — 8-с кылаас кэлэктиибэ «На землянке»;
- төрөппүтү кытта нүөмэргэ — улахан бөлөх кыргыттара ийэлэрин кытта «Журавли» үҥкүү;
- ыытааччылар икки ардыларыгар — 4-с кылаас үөрэнээччитэ Сергучева Эмилия.
Үгэс буолбут сылын аайы ыытыллар «Аһын, таптаа кэрэни» оҕо творческай бэстибээл кынат ылан талааннара сайдар, кэрэҕэ үтүөҕэ тардыһыылара үрдүүр диэн бүк эрэллээхпит. Кыайыылаахтары өссө биирдэ эҕэрдэлиибит, бары кыттааччыларга, үөрэнээччилэргэ, салайааччыларга, дьүүллүүр сүбэҕэ, төрөппүттэргэ уонна Уйбаан Учуунускай аатынан култуурунай киин бары үлэһиттэригэр махталбытын тиэрдэбит!
Ааптар: Мария Шадрина