Тохсунньу 3 күнүгэр «Кулума» култуура киинигэр, Орто Халыма куоратыгар олорор Бастакы Хаҥалас нэһилиэгиттэн төрүттээх биир дойдулаахтар күүстэринэн «Вместе мы – сила!» аһымал кэнсиэр, аукцион, лотерея, дьаарбаҥка ыытылынна.
Биир дойдулаахтар кэнсиэртэригэр «Дьүкээбил», «Гармония», «Саһарҕа», «Кустук» үҥкүү, «Сестрички» ырыа ансаамбыллара, Орто Халыматааҕы норуодунай тыйаатыр артыыстара кыттыыны ыллылар. Үтүө дьыалаҕа И.В.Волков аатынан улуустааҕы гимназия, «Спектр» оҕо сайдар киинэ, Н.И.Шарин аатынан Орто Халыматааҕы орто оскуола, Алексей Созонов аатынан оҕо ускуустубатын оскуолата, «Саһарҕа», «Сказка» оҕо уһуйааннара, «Халыма долгуннара» хаһыат эрэдээксийэтэ уонна биирдиилээн дьон кытынна. Үтүө хамсааһын күүһүнэн 232 110 солк. хомуллан Третьяковтар дьиэ кэргэттэригэр ыытылынна.
Маны тэҥэ аһымал аахсыйа чэрчитинэн, В.А.Местников аатынан Алаһыай орто оскуолатын кэлэктиибэ, үөрэнээччилэрэ, төрөппүттэрэ тэрийбит дьаарбаҥкаларыгар киирбит 53950 солкуобайы Третьяковтар уонна Колесовтар дьиэ кэргэттэригэр ыыттылар.
Ааптар: Саргылана Кокорина