Орто Халыматааҕы бэтэринээринэй сулууспа салалтата иһитиннэрэринэн, сүөһүгэ, дьиэ кыылыгар быһыыны биэрии үлэтэ түмүктэнэн эрэр.
Бу күн туругунан Орто Халыма куоратыгар туоһу докумуоннаах 121 ыкка, 57 куоскаҕа ииримтийиини утары быһыы оҥоһуллубут. Сылгы Ыытарга — 92 ыт, 18 куоска, Ойуһардаахха — 94 ыт, 26 куоска быһыыны ылбыт. Атын нэһилиэктэргэ ыарыыттан сэрэтэр үлэ салҕанар.
Муус устар 26 күнүгэр, Өлөөкө Күөлүгэр адьырҕа кыыл дьон дьиэтин тэлгэһэтигэр киирэн ыттары муокастаабытын туһунан тыллабыр интэриниэти тилийэ көппүтэ. Чахчы буолбут быһылааны Өлөөкө Күөллээҕи бэтэринээринэй сулууспа филиалын сэбиэдиссэйэ Василий Третьяков бу курдук эппиэт биэрдэ: «Муус устар 26 күнүгэр сарсыарданан, бөрө арҕаа түөлбэ бөһүөлэк ыттарын аймаата. Аара суолга икки сылгыны тыҥыраҕынан таарыйбыт. Кыыл тутатына анал булчутунан бултаммыта. Улуустааҕы бэтэринээринэй сулууспа дьаһалынан, кыыл өлөрүллэн суох оҥоһулунна. Бөрө таарыйбыт ыттара, сылгылара кэтэбилгэ тураллар, туруктара үчүгэй. Бөрө быһа холоон көрүүнэн,1 саастаах эдэр кыыл диэн бэлиэтээтибит».